今晚世界盃外圍賽歐洲區第6組撞魚腩哈薩克，「讓球主客和」英軍讓兩球都要捧！「三獅兵團」上仗大炒克羅地亞，球隊信心、士氣攀到近年新高，而且將攻擊重心擺落禾確特身上，令朗尼、謝拉特、迪科爾等壓力大減，今晚於全場九萬球迷吶喊助威下，有機贏兩粒以上。（now 671周日凌晨零時15分直播）
英格蘭近年雷聲大雨點小，上屆世界盃表現不濟八強出局，今年歐國盃更連決賽周都入唔到，「三獅兵團」陷入低潮。失敗令英足總痛定思痛，搵真正世界級名帥卡比路執，終於撥亂反正，上仗作客四比一狂數剋星克羅地亞，成班波士氣大振，仲打起新星禾確特。
禾確特迪科爾當老行
以往英軍中場強、前鋒弱，對弱旅成日老鼠拉龜，但禾仔速度、膽識兼顧，有利拉散弱隊防線，有佢度球隊進攻多板斧，亦直接幫班老大哥減壓。朗尼、林柏特、謝拉特等被捧得太高，但真正攻力未去到頂級，依家各界焦點有禾仔分擔，預計佢發揮應該較佳，加埋弗到漏油迪科爾，唔驚冇貨賣。
另外，因為之前兩仗外圍賽表現出色，球迷今仗瘋狂撲飛支持，溫布萊球場九萬張門票早被掃光，呢場有咁多粉絲撐場，自然打得醒神，雖然隊長泰利出唔到，但都夠踢有餘。
3:0、4:0波膽吼得過
哈薩克上次踢歐國盃外圍賽，成績唔算太曳，比阿美尼亞及阿塞拜疆稍好。呢班波之前作客波蘭輸一比三，對葡萄牙同克羅地亞都係僅吞三蛋，今次預計亦唔會輸六、七粒，而以英格蘭堅固防守好難失波，所以捧「讓球主勝」外，亦可吼3:0、4:0波膽
|
